O‘zbekistonda 2023-yilning sentyabr oyida inflyatsiya 1,24 foizni tashkil etdi. Bu haqda Statistika agentligi ma'lumot berdi.

Bu so‘nggi uch yil ichida ushbu oydagi eng yuqori ko‘rsatkich (2021-yil – 1,09 foiz, 2022-yil – 1,03 foiz), shuningdek, 2023-yil boshidan buyon eng katta o‘sishdir.

O‘tgan oyda oziq-ovqat mahsulotlari o‘rtacha 1,8 foizga, nooziq-ovqat mahsulotlari 1 foizga, xizmatlar 0,6 foizga qimmatlashgan.

Yil boshidan (yanvar-sentyabr) inflyatsiya 5,13 foizgacha oshgan, yillik inflyatsiya (o‘tgan yilning sentyabr oyiga nisbatan) 9,19 foizga (8,96 foiz) tezlashgan. Yil davomida oziq-ovqat mahsulotlari o‘rtacha 11 foizga, nooziq-ovqat mahsulotlari 7,6 foizga, xizmatlar 8,2 foizga qimmatlashgan.

Shuningdek, o‘tgan bir oy ichida qator hududlarda uy-joy ijarasi to‘lovlari oshdi (respublikada o‘rtacha 2,4 foizga).

Sentyabr oyida umumiy ovqatlanish xizmatlari narxi to‘qqizta viloyatda o‘rtacha 0,1 foizdan 2,5 foizga (avgust oyida 0,3 foizdan 5,3 foizgacha) qimmatlashdi.

Bir qator hududlarda palov indeksi o‘zgardi. Bir porsiya palov narxi Buxoro viloyatida 11,9 foizga (28,2 ming so‘mgacha), Samarqand viloyatida 7,3 foizga (27 ming so‘m) oshdi. Navoiy va Qashqadaryo viloyatlarida ham taom qimmatlashgan (2 foiz va 1,6 foiz).

• oziq-ovqat
• statistika