Kecha, 31-yanvar kuni ijtimoiy tarmoqlarda Toshkent shahar Yangihayot (Sergeli) tumanida 12 yashar qizcha bedarak yo‘qolgani hamda ko‘ngillilar, mahalla ahli va ichki ishlar xodimlari tomonidan qidirilayotgani haqida xabarlar tarqaldi.

Bloger Shahnoza Soatovaning ma’lum qilishicha, kechasi 2:30 larda qidiruv to‘xtatilgan, qizchaning murdasi mahallasidan, aniqrog‘i o‘zi yashaydigan uy yaqinidan topilgan.

Ushbu mahalladagi xonadonlardan biriga o‘rnatilgan videokuzatuv kamerasidagi yozuvlar tekshirilganda qizaloq boshi berk ko‘cha tomonga yurayotgani, biroq ortidan bir erkak unga tomon qo‘lini ko‘tarib nimadir deyotgani aks etgan.

Ta’kidlanishicha, bu qizcha tirikligida ko‘ringan oxirgi video. Shundan so‘ng qizchani hech kim ko‘rmagan – uning murdasi yarim tunda yashash xonadoni yaqinidan topilgan.

“Mahalla ahlida har xil gaplar yuribdi. Kimlardir gumonlanib hibsga olingani, videodagi erkak avval qamalib chiqqani aytilyapti”, – deya yozgan Soatova o‘z Telegram kanalida.

Hozircha holat yuzasidan rasmiy ma’lumot berilmagan.

• O'lim
• Qotillik
• Toshkent