Ijtimoiy himoya agentligi direktorining birinchi o‘rinbosari Shahnoza Mirziyoyeva Diyora Keldiyorovaga Ijtimoiy himoya milliy agentligi bilan hamkorlikda bir qancha loyihalarni birgalikda amalga oshirishni taklif qildi. Bu haqda u o‘zining Instagram’dagi sahifasida ma’lum qildi.

Shuningdek, Shahnoza Mirziyoyeva Fransiya poytaxti Parijda Olimpiada chempioni bo‘lgan Diyora Keldiyorova bilan uchrashib, uni shaxsan tabrikladi.

“Yozgi Olimpiya o‘yinlaridagi olamshumul g‘alabasi bilan Diyora Keldiyorovani o‘zim va oilam nomidan qutladim. Vatandoshlarimiz uni bejiz To‘marisga, Oybarchinga o‘xshatishayotgani yo‘q. Chunki u nafaqat mamlakatimiz, balki Markaziy Osiyo mintaqasida Olimpiada chempioni bo‘lgan ilk dzyudochi ayol sifatida sport tarixi sahifalaridan joy oldi”, – deb yozdi u.

Shahnoza Mirziyoyevaning bildirishicha, Diyora Keldiyorovaga Ijtimoiy himoya milliy agentligi bilan hamkorlikda oilalarda ayollarga nisbatan uchraydigan zo‘ravonlikka, jamiyatdagi gender haqsizlikka qarshi qaratilgan bir qancha loyihalarni birgalikda amalga oshirish, shu loyihalarning yuzi va ishtirokchisi bo‘lishni taklif qildi. Diyora uning taklifini mamnuniyat bilan qabul qildi.

“Siz bilan faxrlanamiz, Diyora!” deb yozgan Shahnoza Mirziyoyeva so‘zining so‘ngida.

Eslatib o‘tamiz, 28-iyul kuni dzyudo bo‘yicha O‘zbekiston terma jamoasi aʼzosi Diyora Keldiyorova -52 kg vazn toifasida Parij Olimpiadasida g‘oliblikni qo‘lga kiritgandi. Diyora o‘zbekistonlik dzyudochilar orasida birinchi bo‘lib Olimpiada g‘olibiga aylandi.

• Olimpiada