Buyuk Britaniya qirolining kenja o‘g‘li – shahzoda Garri joriy yilning 6-may kuni otasi, qirol Charlz III ning toj kiyish marosimida ishtirok etadi. Uning rafiqasi Megan Markl esa farzandlari – shahzoda Archi va malika Lilibet bilan AQShda qoladi.

74 yoshli Charlz III ning toj kiyish marosimida umumiy hisobda 2000 nafar mehmon ishtirok etadi. Marosim 6-may kuni, qirolicha Yelizaveta II vafotidan roppa-rosa 8 oy vaqt o‘tib, Londondagi Vestminster abbatligida o‘tkaziladi.

Toj kiyish marosimiga bugungi kunga qadar Belgiya, Vengriya, Irlandiya, Ispaniya, Monako, Fransiya yetakchilari, Yevroittifoq rahbarlari va Shotlandiyaning yangi vaziri Hamza Yusaf ham taklif etib ulgurilgan. AQSh prezidenti Jo Bayden esa marosimda uning nomidan rafiqasi Jill Bayden ishtirok etishini ma’lum qilgan.

Eslatib o‘tamiz, shahzoda Garri va uning rafiqasi Megan Markl 2020-yilning yanvar oyida Britaniya qirollik oilasi unvonlaridan voz kechishga qaror qilishgan. Juftlik shu tariqa turli safarlarda Angliya monarxining rasmiy vakili sifatida qatnashish, imtiyozlardan foydalanish imkoniyatidan mahrum bo‘lib, yashash uchun AQShga ko‘chib o‘tgan.

• Buyuk Britaniya
• Charlz III
• Jahon
• Qirolicha
• mashhurlar
• qirol
• xabar