Ayni damda Prezident raisligida ichimlik suvi ta’minotini yaxshilash masalalari yuzasidan yig‘ilish bo‘lib o‘tmoqda.
Ta’kidlanishicha, Shavkat Mirziyoyev viloyat hokimlari oldiga kelgusi ikki yilda 2 mingta bog‘cha, maktab va tibbiyot muassasalarini ichimlik suvi bilan ta’minlash vazifasini qo‘ydi.
Ushbu maqsadlar uchun respublika byudjetidan 50 milliard so‘m, mahalliy byudjetlar hisobidan yana 50 milliard so‘m ajratiladi.
Bundan tashqari, Jahon bankining qishloqlar infratuzilmasini yaxshilashga ajratilgan 160 milliard so‘m hamda “Obod qishloq” va “Obod mahalla” dasturlarida 413 ta mahallada ichimlik suvi ta’minotini yaxshilashga beriladigan 1 trillion so‘m mablag‘lar ham birinchi navbatda shu maqsadlarga yo‘naltiriladi.
Qayd etilishicha, ushbu maqsadlarga qo‘shimcha 100 million dollar xalqaro moliya tashkilotlarining mablag‘larini jalb qilish topshirildi.
Viloyat hokimlari “Uzsuvta’minot” bilan birga joriy yilning o‘zida markazlashgan ichimlik suvi ta’minotini 75 foizga yetkazishi shartligi ko‘rsatib o‘tildi.
“Har bir viloyat o‘zini rejalarini o‘n kunda qayta ko‘rib chiqib, ularni oshirish bo‘yicha taklifni berishi zarur”, deydi Prezident.
Bu ishlarni jadallashtirish uchun suv ta’minoti loyihalari bo‘yicha joylardagi “O‘zsuvta’minot”ning injiniring kompaniyalari viloyat hokimliklari tasarrufiga o‘tkaziladi. Loyiha-smeta hujjatlarini ishlab chiqish, pudratchilarni aniqlash va moliyalashtirishni ochish viloyatning o‘zida bo‘ladi.
Uy-joy kommunal xizmat ko‘rsatish vazirligi va “Uzsuvta’minot” loyihalarga texnik talablarni belgilaydi va ularni ekspertizadan o‘tkazadi, ishlarni qabul qilib, ekspluatatsiyaga mas’ul va javobgar bo‘ladi.
Mutasaddilarga ushbu yangi tizimni amaliyotga joriy qilish topshirildi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!