Bugun Oʻzbekiston Respublikasi Prezidenti Shavkat Mirziyoyev mamlakatimizda amaliy tashrif bilan boʻlib turgan Birlashgan Millatlar Tashkiloti Bosh kotibining oʻrinbosari, BMT Narkotiklar va jinoyatchilik boʻyicha boshqarmasi ijrochi direktori Gada Valini qabul qildi.

Uchrashuvda global va mintaqaviy xavfsizlikka tahdid solayotgan zamonaviy xavf va xatarlarga qarshi kurashish sohasidagi hamkorlikning dolzarb masalalari koʻrib chiqildi.

Qayd etilishicha, Gada Valining tashrifi doirasida Markaziy Osiyo mamlakatlari uchun 2022-2025-yillarga moʻljallangan yangi mintaqaviy hamkorlik dasturi qabul qilindi, ushbu dasturda beshta ustuvor yoʻnalishda 90 million dollarlik tadbir va loyihalarni amalga oshirish koʻzda tutilgan.

Uchrashuvda narkotiklarning noqonuniy aylanmasi, uyushgan jinoyatchilik va xalqaro terrorizmga qarshi kurashish sohasida, korrupsiyaga qarshi kurashish maqsadida elektron platforma joriy qilish va boshqa yoʻnalishlarda sheriklik va oʻzaro muvofiqlashuvni yanada kengaytirish masalalari koʻrib chiqildi.

Bundan tashqari, shu kunlarda Samarqand shahrida Yoshlarning giyohvand moddalarga qarshi mintaqaviy tarmogʻi ishga tushiriladi hamda Buxoro shahrida Odam savdosiga qarshi kurash boʻyicha xalqaro konferensiya oʻtkaziladi.

• BMT
• Prezident