Prezident Shavkat Mirziyoyev bugun kuni kimyo sanoatida amalga oshirilayotgan ishlar tahlili va yangi loyihalar muhokamasi yuzasidan yigʻilish oʻtkazdi.

Yigʻilishda mamlakatimiz rahbari Qoraqalpogʻiston Respublikasi, Toshkent, Navoiy va Fargʻona viloyatlarida ishga tushiriladigan 4 ta texnologik kimyo klasterlari haqida gapirdi. Klasterlarda uglerod, poliefir va atsetat tolasi, polivinilatsetat, kaliy nitrati kabi 20 dan ziyod mahsulot ishlab chiqarish rejalashtirilgan. 

Davlatimiz rahbari bu loyihalar tarmoqdagi ulkan imkoniyatlarga nisbatan yetarli emasligini, investitsiya jalb etib, mahsulotlarni koʻpaytirish mumkinligini taʼkidladi.

Shuningdek, yig‘ilishda kelgusi yilda ishlab chiqarish hajmini 12 trillion soʻmga, eksportni 380 million dollarga yetkazish imkoniyatlari ham koʻrib chiqildi. Sohani raqamlashtirish, korxonalarda operatsion xarajatlar va energiya sarfini qisqartirish orqali mahsulot tannarxini kamaytirish vazifasi qoʻyildi.

Yangi korxonalarni kadrlar bilan taʼminlash ham muhim masala. Shu maqsadda kelgusi yilda 6 ming nafar oliy va oʻrta boʻgʻin mutaxassislarini tayyorlash moʻljallangan. Tarmoqdagi 6 ta korxona negizida oʻquv markazlari hamda Chirchiq shahrida ishchi-mutaxassislar tayyorlash majmuasini ishga tushirish belgilangan.

Yigʻilishda belgilangan vazifalar boʻyicha tegishli hujjatlar qabul qilinib, ijrosi taʼminlanadi.

• Prezident