Prezident Shavkat Mirziyoyev joriy yilning 17–18-avgust kuni Saudiya Arabistoniga tashrif buyuradi.

Qayd etilishicha, ushbu tashrif dasturiga muvofiq Jidda shahrida oliy darajadagi muzokaralar bo‘lib o‘tadi. Ularda ikki mamlakat o‘rtasidagi ko‘p qirrali hamkorlikni yanada kengaytirish masalalari muhokama qilinadi.

Muzokaralarda alohida e’tibor “yashil iqtisodiyot”, yuqori texnologiyalar va raqamlashtirish, innovatsiyalar, kichik biznes va tadbirkorlik sohalariga qaratiladi.

Sammit yakunida ikki tomonlama hujjatlarning katta to‘plami imzolanishi kutilmoqda.

Shuningdek, O‘zbekiston prezidenti Saudiyaning yetakchi kompaniyalari, nufuzli xalqaro tuzilmalar – Islom hamkorlik tashkiloti va Islom taraqqiyot banki rahbarlari bilan uchrashuv o‘tkazadi.

Qolavers, mamlakat rahbari Makkai Mukarrama va Madinayu Munavvarani ziyorat qiladi.

Ma’lumot uchun, ushbu tashrif oxirgi 30 yil davomida O‘zbekiston prezidentining Saudiya Arabistoniga birinchi tashrifi bo‘ladi.

• Saudiya Arabistoni
• Shavkat Mirziyoyev