Prezident raisligida sanoat kooperatsiyasini rivojlantirish va ishlab chiqarishni mahalliylashtirish chora-tadbirlari yuzasidan videoselektor yig‘ilishi bo‘lib o‘tmoqda. 

Ma’lum qilinishicha, 37 trillion so‘mlik yangi mahsulot ishlab chiqarish bo‘yicha 2022-2023-yillar uchun 2,5 mingta loyihani ishga tushirish bo‘yicha qabul qilingan dasturning aniq ijrosini so‘rash vaqti kelgani qayd etilgan.

Shuningdek, yigilishda Prezident ko‘p tarmoq va hudud rahbarlari bu masalada hali dunyoqarashini o‘zgartirmagani, hozirgi vaziyatdan xulosa chiqarmayotganini tanqid qilgan.

Ushbu dastur ijrosi bo‘yicha Farmasevtika agentligi rejani 51 foizga, “O‘zbekiston temir yo‘llari” esa 10 foizga bajarmagani,sanoat kooperatsiyasi bo‘yicha ishlar boshlanmagani, “Issiqlik elektr stansiyalari” esa rejani atigi 26 foizga bajargani ko‘rsatilgan.

Shuning uchun Farmasevtika tarmog‘ini rivojlantirish agentligi direktori S.Kariyevga “hayfsan” e’lon qilindi. Uning ikkala o‘rinbosarini ishdan olishga ko‘rsatma berildi. 

Bosh vazirga mazkur Agentlik faoliyatini tubdan o‘zgartirish bo‘yicha aniq choralar ko‘rish topshirildi.

Qayd etish joiz, yig‘ilishda “O‘zbekiston temir yo‘llari” raisi v.b. X.Xasilovga “hayfsan”, "Issiqlik elektr stansiyalari" raisi F.Abduraxmonov, "O‘zmetkombinat" direktori R.Pirmatov, "O‘zbekneftgaz" raisining birinchi o‘rinbosari Sh.Alirizayevga qat’iy ogohlantirish berilgan.

Bundan tashqari, yanvar-fevral oylarida “Elektron kooperatsiya” portali orqali 860 mlrd. so‘mlik 5 mingta shartnoma tuzilgan bo‘lsada, ijrosi ayrim hududlarda bajarilmagani, elektron savdolarda Qoraqalpog‘iston, Namangan, Surxondaryo va Xorazmdagi korxonalar ulushi 1 foizni ham tashkil qilmasligi tanqid qilingan.

• Hayfsan
• Prezident
• Shavkat Mirziyoyev
• Videoselektor