O‘zbekiston Respublikasi Prezidenti Shavkat Mirziyoyev qurilish sohasi xodimlariga tabrik yo‘lladi.

Prezident tabrikda qurilish sohasi xodimlarining xizmati mamlakatda muhim o‘rinda ekanligini aytib, tashakkur izhor qildi.

“Avvalo, siz, azizlarni mamlakatimizda keng nishonlanayotgan qutlug‘ kasb bayramingiz – Qurilish sohasi xodimlari kuni bilan chin qalbimdan muborakbod etib, barchangizga yuksak hurmat-ehtirom va samimiy tilaklarimni bildiraman.

Ma’lumki, mamlakatimiz ravnaqi, xalqimiz farovonligini ta’minlashda mazkur soha xodimlari – mohir quruvchi va me’morlar, mexanik va murakkab texnikalarni boshqarayotgan insonlar, loyihachi va dizaynerlar, qurilish sanoati vakillari va pudratchilarning mehnati hamisha muhim o‘rin tutib keladi.

Sizlarning timsolingizda shahar va qishloqlarimizda, butun yurtimizda yangi-yangi ishlab chiqarish korxonalari, muhim ijtimoiy ob’ektlar, zamonaviy uy-joylar, yo‘l va ko‘priklar barpo etib, hayotimizni yanada go‘zal va obod qilishga beqiyos hissa qo‘shib kelayotgan olijanob kasb egalarini ko‘ramiz.

Ushbu quvonchli ayyomda sizlarni Yangi O‘zbekiston bunyodkorlari sifatida e’zozlab, sha’ningizga eng yuksak ta’rif va tilaklarimizni izhor etamiz, fidokorona mehnatingiz uchun chin dildan tashakkurlar aytamiz.

Aholini arzon va sifatli turar-joy bilan ta’minlash dasturlari doirasida namunali ko‘p qavatli uylar atrofida madaniyat va san’at markazlari, sport inshootlari, tibbiyot muassasalari va boshqa maskanlar barpo etilayotgani, “Obod qishloq” dasturi bo‘yicha 413 ta mahallaning bosh rejasi ishlab chiqilayotgani inson haqidagi e’tibor va g‘amxo‘rlikning amaliy namunasidir.

Siz, azizlarni kasb bayramingiz bilan yana bir bor chin qalbimdan tabriklab, barchangizga sihat-salomatlik, oilaviy baxt va xonadonlaringizga qut-baraka tilayman.

Qo‘lingiz hech qachon dard ko‘rmasin, mehnatingizning rohatini ko‘ring, aziz bunyodkorlar!”, – dedi Prezident.

• AQSh
• Rossiya
• Shavkat Mirziyoyev
• Tabrik