17-yanvar kuni Shavkat Mirziyoyev amaliy tashrif bilan Toshkent shahrida boʻlib turgan Turkmaniston Vazirlar Mahkamasi Raisining oʻrinbosari Serdar Berdimuhamedovni qabul qildi. Bu haqida Prezident matbuot xizmati xabar berdi.

Uchrashuv avvalida Mirziyoyev Oʻzbekiston va Turkmaniston oʻrtasidagi doʻstlik, yaxshi qoʻshnichilik va strategik sheriklik munosabatlari keyingi yillarda izchil rivojlanib borayotganini alohida mamnuniyat bilan qayd etgan.

Shuningdek, yuqori martabali mehmon qabul uchun samimiy minnatdorlik bildirib, Turkmaniston Prezidenti Gurbanguli Berdimuhamedovning salomi va eng ezgu tilaklarini yetkazdi hamda Turkmaniston yetakchisining barcha yoʻnalishlarda jadal rivojlanib borayotgan Turkmaniston-Oʻzbekiston aloqalariga yuksak baho berilgan maktubini topshirgan.

Unda Turkmaniston rahbari ikki mamlakatning xalqaro siyosat va mintaqaviy munosabatlar borasidagi pozitsiyalari yaqin va oʻxshashligini alohida qayd etgan.
Qayd etilishicha, uchrashuvda oliy darajada erishilgan kelishuvlarning amalga oshirilishi koʻrib chiqilgan.

Oʻzaro savdo hajmini oshirish, sanoat, energetika, suv va qishloq xoʻjaligi sohalarida yangi kooperatsiya loyihalarini roʻyobga chiqarish hamda ikki mamlakat tranzit salohiyatidan samarali foydalanish boʻyicha hamkorlikni mustahkamlash masalalari va bu boradagi amaliy chora-tadbirlarga alohida eʼtibor qaratilgan. Bundan tashqari, hududlararo aloqalar va madaniy-gumanitar almashinuvni rivojlantirish muhim ekani alohida ta’kidlangan.

• Prezident
• Shavkat Mirziyoyev
• Turkmaniston