Turkmaniston Vazirlar Mahkamasi Raisining o‘rinbosari, tashqi ishlar vaziri Rashid Meredov O‘zbekistonning “Do‘stlik” ordeni bilan mukofotladi. Bu haqda Tashqi ishlar vazirligi matbuot xizmati xabar berdi.

Qayd etilishicha, O‘zbekiston tashqi ishlar vaziri v.b. Vladimir Norov boshchiligidagi delegasiyaning Ashxobodga tashrifi doirasida Rashid Meredovga O‘zbekiston va Turkmaniston o‘rtasidagi ko‘p asrlik do‘stlik va yaxshi qo‘shnichilik rishtalarini, strategik sherikchilik va ko‘p qirrali hamkorlik munosabatlarini rivojlantirish va mustahkamlashga qo‘shgan ulkan shaxsiy hissasi uchun “Do‘stlik” ordenini topshirishga bag‘ishlangan tantanali marosim bo‘lib o‘tgan.

O‘zbekiston Prezidentining tegishli Farmonini Tashqi ishlar vaziri v.b. Vladimir Norov o‘qib eshittirgan.

Rashid Meredov O‘zbekiston Prezidenti Shavkat Mirziyoyevga uning faoliyatiga berilgan yuksak baho va “Do‘stlik” ordeni bilan taqdirlangani uchun minnatdorlik bildirgan.

Turkmaniston Tashqi ishlar vaziri bundan buyon ham ikki qardosh davlat o‘rtasidagi ko‘p qirrali va strategik sheriklikni rivojlantirish uchun barcha sa’y-harakatlarni amalga oshirish niyatida ekanini ta’kidlagan.

Shuningdek, Turkmaniston prezidenti Serdar Berdimuhamedovning farmoni bilan O‘zbekiston prezidenti huzuridagi Xavfsizlik kengashi kotibi o‘rinbosari, prezidentning tashqi siyosat bo‘yicha maxsus vakili Abdulaziz Kamilov hamda tashqi ishlar vaziri v. b. Vladimir Norov Turkmanistonning “Galkinish” (“Tiklanish”) ordeni bilan taqdirlandi.

Mukofotni 26-avgust kuni Ashxobodda ikki davlat tashqi ishlar vazirliklari o‘rtasidagi siyosiy maslahatlashuvlar doirasida Turkmaniston Vazirlar Mahkamasi raisi o‘rinbosari, Tashqi ishlar vaziri Rashid Meredov topshirdi. Mukofot “Turkmaniston va O‘zbekiston Respublikasi o‘rtasidagi iqtisodiy, ilmiy-texnikaviy va madaniy hamkorlikni rivojlantirishdagi ulkan xizmatlari uchun” topshirilgan.

• Mukofot
• O‘zbekiston
• TIV
• Turkmaniston