Prezident Shavkat Mirziyoyev davlat tashrifi bilan Dushanbe shahriga yetib bordi. Bu haqda Prezident matbuot kotibi ma’lum qildi.

Qayd etilishicha, poytaxt aeroportida davlatimiz rahbarini Tojikiston Respublikasi Prezidenti Emomali Rahmon kutib olgan.

Oliy martabali mehmon sharafiga faxriy qorovul saf tortgan va ikki mamlakat davlat bayroqlari ko‘tarilgan. O‘zbekiston Prezidentini kutib olishda Tojikiston yoshlari va ijodiy jamoalari vakillari ham qatnashgan.

So‘ng Prezidentimiz “Do‘stiy” maydoniga tashrif buyurib, Ismoil Somoniy haykali poyiga gul qo‘ygan.

Ta’kidlash joizki, oliy darajadagi muzokaralarda yetakchilar O‘zbekiston-Tojikiston strategik sheriklik va ittifoqchilik munosabatlarini yanada rivojlantirish masalalarini muhokama qiladilar, xalqaro va mintaqaviy darajadagi hamkorlik yuzasidan fikr almashadilar.

Tashrif dasturida ikki mamlakat san’at ustalarining konsertini birgalikda tomosha qilish hamda “Made in Uzbekistan” mahsulotlar ko‘rgazmasi bilan tanishish rejalashtirilgan.

Shuningdek, davlat tashrifi doirasida bir qator tadbirlar, shu jumladan xotin-qizlar forumi, O‘zbekiston kinosi kunlari, ziyolilar, olimlar va tarixchilar konferensiyasi, milliy taomlar va turizm salohiyati festivali bo‘lib o‘tgan.

Avvalroq Toshkent shahrida Rektorlar forumi va Dushanbe shahrida biznes forumi o‘tkazilgan edi.

• Prezident
• Tojikiston