Yaqinda ijtimoiy tarmoqlarda Markaziy Osiyodan borgan mehnat muhojirlari Rossiyada tahqirlangani aks etgan lavhalar keng tarqalib, jamoatchilikning e’tirozlariga sabab bo‘lgan edi. Ushbu voqeaga O‘zbekiston jurnalistika va ommaviy kommunikatsiyalari universiteti rektori, taniqli jurnalist, teleboshlovchi, siyosatshunos, “politologiya” fanlari doktori va professor – Sherzodxon Qudratxo‘ja munosabat bildirdi.

“Moskvadagi so‘nggi voqealar — hujjatlarida muammosi bor migrantlarni haqoratlash, ularni tepish, xorlash holatlari — afsuski, odatiy holga aylanmoqda. O‘zbek yoshlari eng og‘ir mehnatlarni bajarsa-da, shunga munosib muomala ko‘rmayapti.

O‘zbekistonda ishsizlik muammosi bor, lekin bu yoshlarni Rossiyaga yuborish yechim emas. Ular u yerda inson sifatida qadrlanmaydi. Biz yoshlarimizni til o‘rganishga, yaxshi hunar egallashga va rivojlangan davlatlar — Olmoniya, BAA, Yaponiya, Janubiy Koreya kabi mamlakatlarga yo‘naltirishimiz zarur.

Hozir O‘zbekistonga hatto Hindiston va Bangladeshdan ishchilar kelyapti, chunki o‘zimiznikilar ichki ishlarga qiziqmay qolishgan. Bu ham og‘riqli, lekin o‘zga yurtda tahqirlanishdan afzalroq.

Rossiya rasmiylaridan bunday tahqirlashlarni to‘xtatishni talab qilamiz. Chunki o‘zbeklar tarixda ko‘p millatga panoh, g‘amxo‘rlik va mehr ko‘rsatgan. Bunday munosabat bizga nisbatan insofsizlik, balki natsizmning o‘zi”, – degan u.

• Fikr
• Rossiya
• Sherzodxon Qudratxo‘ja
• muhojir