Xabar berilganidek, joriy yilning 15-16-sentabr kunlari Samarqand shahrida Shanxay hamkorlik tashkilotining O‘zbekiston mezbonligida navbatdagi sammiti bo‘lib o‘tadi.

Shuningdek, 14-sentabrdan 17-sentabrga qadar Samarqand shahrining ayrim ko‘chalarida transport vositalarining harakati cheklanishi haqida ma’lum qilingan edi.

Sog‘liqni saqlash vazirligi shu kunlarda shahar hududida tibbiy yordamni tashkil etish bo‘yicha bir nechta yangiliklarni ma’lum qildi.

Qayd etilishicha, sammit kunlari davomida Samarqand shahrida tibbiy yordam 3 yo‘nalishda tashkil etiladi:

tez tibbiy yordam ko‘rsatish;
ambulator yordam ko‘rsatish;
shifoxonada shoshilinch tibbiy yordam ko‘rsatish.

Shahar aholisiga 50 ga yaqin tez tibbiy yordam mashinasi va shuncha tibbiy brigada jalb etilgan bo‘lib, ular chaqiriqlar bo‘yicha odatdagidek faoliyat olib boradi.

Ambulator yordam ko‘rsatish uchun Samarqand shahar tibbiyot birlashmasiga qarashli barcha oilaviy poliklinikalarda odatdagidek soat 8:00 dan 20:00 gacha ish foaoliyati olib boriladi.

Shuningdek, har bir mahalla fuqarolar yig‘inida aholiga tibbiy xizmatni yaqinlashtirish maqsadida oila shifokorlari va 2 nafar hamshiradan iborat tibbiy punktlar tashkil qilingan. Ular birinchi yordam uchun zarur dori-darmon vositalari bilan ta’minlangan bo‘lib, bu orqali yengil darajadagi bemorlarga mahallaning o‘zida ambulator yordam ko‘rsatish ta’minlanadi.

Shoshilinch holatlarda “103” xizmatiga murojaat qilinadi!

Alohida ta’kidlash joizki, konservativ davolanishga muhtoj bemorlarga tuman shifoxonalarida ixtisoslashtirilgan tibbiy yordam ko‘rsatish uchun viloyat shifoxonalarida faoliyat ko‘rsatuvchi malakali mutaxassislar jalb etiladi.

Bundan tashqari, shoshilinch va kechiktirib bo‘lmaydigan holatlarda mobil tez tibbiy yordam brigadalari tomonidan viloyat shifoxonalaridan malakali mutaxassislar tuman va shahar birlashmalariga yuborilib, shu joyning o‘zida shoshilinch operasiyalar o‘tkazish imkoniyatlari yaratiladi.

Bu boradagi barcha harakatlar vazirlik tomonidan Samarqand viloyat sog‘liqni saqlash boshqarmasida tashkil etilgan markaziy shtab orqali boshqarib boriladi.

• SSV
• Samarqand
• ShHT
• tez_yordam