Shimoliy Koreya yetakchisi Kim Chen In harbiy mashg‘ulotlarni kengaytirishga va mamlakatning urushga tayyorligini kuchaytirishga va’da berdi, deyiladi “Reuters” nashri xabarida.

Nashrning yozishicha, Kim Chen In raisligidagi KXDR hukmron ishchilar partiyasining Markaziy harbiy komissiyasi yig‘ilishi bo‘lib o‘tgan. Unda rasmiylar mamlakatning 2023-yilga mo‘ljallangan “asosiy harbiy-siyosiy vazifalari”, shuningdek, “armiya qurilishi”ga yo‘naltirish bilan bog‘liq uzoq muddatli masalalarni muhokama qilgan.

“Mavjud vaziyatdan chiqish uchun KPA (Koreya xalq armiyasi, tahr.) operasiyalari hamda jangovar mashg‘ulotlarini doimiy ravishda kengaytirish va kuchaytirish masalasi muhokama qilindi”, – deyiladi Shimoliy Koreya davlat matbuotida.

Jurnalistlarning ta’kidlashicha, 8-fevral, chorshanba kuniyoq KXDR o‘z qurolli kuchlari tashkil topgan kun sharafiga harbiy mashg‘ulotlar o‘tkazadi.

Materialda aytilishicha, ayni paytda Pxenyan AQSH va Janubiy Koreyaning harbiy mashqlarini qoralagan. KXDR Vashington va Seul “so‘nggi qizil chiziqqa” erishganiga amin.

“Koreya yarim oroli va mintaqadagi harbiy-siyosiy vaziyat AQSH va uning vassal kuchlarining o‘ylamasdan harbiy qarama-qarshilik manyovrlari, dushmanlik harakatlari tufayli so‘nggi qizil chiziqqa yetib keldi”, – deyiladi KXDR hukumati bayonotida.

Bundan tashqari, Shimoliy Koreya o‘zining “dushmanlik siyosatini” to‘xtatishi kerak bo‘lgan AQSH bilan muzokaralar olib borishdan hozircha manfaatdor emasligi ma’lum qilingan.

Avvalroq Focus nashri NATO bosh kotibi Stoltenberg Shimoliy Koreya vagneritlarni Rossiyaning Ukraina bilan urushi uchun raketalar bilan ta’minlaganini aytganini yozgan edi. NATO Bosh kotibiga ko‘ra, bunday ta’minot Rossiya Federasiyasining Ukrainaga qarshi agressiv urushini yanada kuchaytiradi. U Shimoliy Koreya rasmiylarini bunday provokasiyalarni to‘xtatishga va xalqaro qonunlarga rioya qilishga chaqirdi.

Shuningdek, Kim Chen In 35 kundan buyon omma oldiga chiqmagani ma’lum qilingan. Bu Shimoliy Koreya yetakchisi g‘oyib bo‘lishining ikkinchi eng uzoq davri. 2014-yilda u 40 kun davomida ko‘rinish bermagan.

• KXDR
• Kim Chen In
• Urush