Shri-Lanka bosh vaziri Ranil Vikremesingxening aytishicha, mamlakat iqtisodiyoti tanazzulga yuz tutgan va bu hukumat oldida turgan eng jiddiy muammo. Bu haqda ABC News agentligi xabar berdi.

Qayd etilishicha, Shri-Lanka 1948-yilda mustaqillikka erishganidan beri eng yomon iqtisodiy inqirozni boshdan kechirmoqda. Aprel oyi o‘rtalarida Shri-Lanka hukumati XVJ tomonidan qo‘llab-quvvatlanadigan iqtisodiy moslashuv dasturi doirasida ushbu majburiyatlarni qayta tuzilmaguncha, oraliq davr uchun tashqi qarzlarini defolt qildi. Orol davlatining tashqi qarzi 51 milliard dollarga baholanmoqda.

“Endi biz yoqilg‘i, gaz, elektr energiyasi va oziq-ovqat etishmasligidan tashqari, ancha jiddiy vaziyatga duch keldik. Iqtisodiyotimiz butunlay tanazzulga yuz tutdi. Bu bugungi kunda oldimizda turgan eng jiddiy muammodir”, – deydi bosh vazir.

Uning so‘zlariga ko‘ra, mamlakat neft va gaz kompaniyasi “Ceylon Petroleum Corporation”ning 700 million dollar miqdorida qarzi bor.

“Agar boshida hech bo‘lmaganda iqtisodning tanazzulini sekinlashtirish choralari ko‘rilganida edi, bugun biz bunday og‘ir vaziyatga duch kelmasdik. Lekin biz bu imkoniyatni qo‘ldan boy berdik”, deya qo‘chimcha qilgan Vikremesingxe.

• Bosh vazir
• Iqtisodiyot
• Jahon
• Shri-Lanka
• Tashqi qarz