Namoyishlar tinmayotgan Shri-Lankada mamlakat prezidenti Gotabaya Rajapaksa rasmiylarga 3700 metrik tonna dizel yoqilg‘isini aholiga bepulga tarqatish bo‘yicha ko‘rsatma berdi. Qayd etilishicha, bortiga 3700 metrik tonna yoqilg‘i ortilgan birinchi kema Keravalapitiya hududiga keladi.

Mahalliy OAV xabarlariga ko‘ra, 3740 metrik tonna dizel yoqilg‘isi ortilgan ikkinchi kema 11-iyulda, 3200 metrik tonna yoqilg‘i bo‘lgan uchinchi kema esa hududga 15-iyulda yetib keladi.

Shri-Lankadagi namoyishlar:

Joriy yilning 9-iyul kuni orol davlatni hukumatga qarshi keng ko‘lamli aksiyalar qamrab oldi. Namoyishchilar Shri-Lanka hukumatining iste’foga chiqishini talab qilmoqda. Yuzlab namoyishchilar barrikadalarni buzib o‘tib, prezident Gotabay Rajapaksaning rasmiy qarorgohi va idorasi joylashgan kampusga kirishgan. O‘sha paytda prezident kampusni tark etgan, uni xavfsiz joyga olib ketishgan.
Qolaversa, siyosiy partiyalar yetakchilari Shri-Lanka prezidenti Gotabay Rajapaksa va bosh vazir Ranil Vikremesingening iste’fosini talab qilishgan. Bunga javoban Vikremesinge iste’foga chiqish va yangi hukumatni shakllantirishga tayyorligini ma’lum qilgan.

Shri-Lanka prezidenti Gotabaya Rajapaksa ham namoyishchilar talablariga rozi bo‘ldi va 13-iyul kuni o‘z lavozimini tark etadi.

• Shri-Lanka
• yoqilg‘i