Shu kunga qadar Bandlik va mehnat munosabatlari vazirligining xususiy bandlik agentliklari (XBA) reyestridan 108 ta yuridik shaxs ro‘yxatdan o‘tgan bo‘lib, ulardan 78 tasiga xorijda ishlash istagidagi fuqarolarni ishga joylashtirish bo‘yicha faoliyatni amalga oshirish huquqini beruvchi litsenziya berilgan.

Ammo bugungi kunga kelib, 70 ta xususiy bandlik agentligining litsenziyasi bekor qilingan. Hozirgi vaqtda litsenziyaga ega 8 ta xususiy bandlik agentligidan 6 tasi faoliyat yuritmoqda (1 ta xususiy bandlik agentligining litsenziyasi tiklash jarayonida va 1 ta xususiy bandlik agentligining litsenziyasi sud tomonidan to‘xtatilgan).

Bandlik va mehnat munosabatlari vazirligi boshqarma boshlig‘i Zohid Asqarovning ma’lum qilishicha, 2019–2020-yillarda xususiy bandlik agentliklarining sa’y-harakati natijasida 3 ming 300 ga yaqin fuqaro Rossiya, Turkiya, Litva, Latviya, Polsha, Bolgariya, BAA, Saudiya Arabistoni, Belarus, Xorvatiya, Yaponiya, Estoniya, Qozog‘iston, Ukraina, Isroil, Germaniya, Gresiya, Qatar kabi davlatlarga qonuniy tarzda ishga joylashtirildi. 

Shuningdek, vazirlik boshqarma boshlig‘i aksariyat xususiy bandlik agentliklari tomonidan litsenziya talablarini buzish holatlari uchrayotganini ta’kidladi.

 “Biroq, ular tomonidan lisenziya talablari va shartlarini buzish holatlari uchramoqda. 
Ma’lumotlarga ko‘ra, 11 ta xususiy bandlik agentligi tomonidan fuqarolarga 71,8 mlrd. so‘m miqdorida zarar yetkazilgan va ularga nisbatan jinoiy ishlar qo‘zg‘atilgan”, – dedi Z. Asqarov.

• Mehnat_vazirligi
• Migratsiya