Investitsiyalar va tashqi savdo vazirligida Sirdaryo viloyatida 1600 MVt quvvatga ega boʻlgan issiqlik elektr stansiyasini qurish boʻyicha xalqaro tender natijalari eʼlon qilindi.

Dastlabki malaka tanlovida Xitoy, Janubiy Koreya, Yaponiya, Saudiya Arabistoni, BAA va Fransiyadan 10 ta kompaniya ishtirok etib, ulardan 8 tasi ushbu tanlovdan muvaffaqiyatli oʻtgan.

Talabgorlarning taqdim etilgan malakaviy maʼlumotlarni baholash natijalariga muvofiq, Sirdaryo viloyatidagi loyiha boʻyicha 2 ta kompaniya va 1 ta konsorsiumdan yuborilgan elektr energiyasi tariflari toʻgʻrisidagi moliyaviy takliflar ochilishiga ruxsat berilgan.

Bular “ACWA Power” (Saudiya Arabistoni Podshohligi) hamda “Powerchina Resources Ltd” (XXR) kompaniyalari, shuningdek, “EDF” (Fransiya), “Nebras Power” (Qatar), “Sojitz Corporation” (Yaponiya) kompaniyalar konsorsiumidir.

“EDF, Nebras Power, Sojitz Corporation” (Fransiya, Qatar, Yaponiya) kompaniyalar konsorsiumi ishlab chiqariladigan 1 kVt*s elektr energiya uchun 3,367 AQSh syentga teng boʻlgan tarifi bilan issiqlik elektr stansiyasini qurish boʻyicha xalqaro tender gʻolibi deb eʼlon qilingan.

“Powerchina Resources Ltd” (XXR) ishlab chiqariladigan 1 kVt*s elektr energiya uchun 3,471 AQSh syentga teng boʻlgan tarifi bilan ushbu tenderning zaxira gʻolibi boʻlgan.

Taʼkidlanishicha, 2025-yilning oʻrtasida ishga tushirilishi kutilayotgan elektr stansiyasi yiliga 12 mlrd. kVt*s elektr energiyasi ishlab chiqarishni taʼminlaydi.

Keltirilishicha, ushbu loyihaning amalga oshirilishi Oʻzbekistonga ekologik toza elektr energiyasi hajmini oshirish maqsadlariga erishish, 1,5 mln. xonadonni qoʻshimcha elektr energiyasi bilan taʼminlash, shuningdek, qurilish vaqtida 1 000 ga yaqin yangi hamda stansiyadan foydalanish vaqtida 50 ta doimiy ish oʻrni yaratishga imkon beradi.

Oʻz navbatida, loyihani amalga oshirishga jalb qilinayotgan investitsiyalar miqdori esa 1,2 mlrd. dollarga baholanmoqda.

• Elektr energiyasi
• Vazirlik