Prezident qarori bilan Farrux Sharipov, Farxodjon Tashpulatov va Olim Omonov sogʻliqni saqlash vaziri oʻrinbosarlari etib tayinlandi. Bu haqda vazirlik matbuot xizmati xabar qildi.

Xususan, Farrux Raximovich Sharipov Oʻzbekiston sogʻliqni saqlash vazirining oʻrinbosari lavozimiga tayinlandi.

Farrux Sharipov 1969-yilda Samarqand viloyatida tugʻilgan. 1993-yil Samarqand davlat tibbiyot instituti, 2010-yil Toshkent davlat iqtisodiyot universitetini tamomlagan. 2002−2009-yillarda Toshkent tuman tibbiyot birlashmasi boshligʻi, 2009−2012-yillarda Sirdaryo viloyati sogʻliqni saqlash boshqarmasi boshligʻi lavozimlarida mehnat qilgan. 2012−2014-yillarda Sogʻliqni saqlash vazirligi bosh boshqarma boshligʻi boʻlgan. 2015−2016-yillarda Yakkasaroy tuman tibbiyot birlashmasi boshligʻi lavozimida ishlagan.

Farrux Sharipov 2021-yildan Vazirlar Mahkamasi huzuridagi Davlat tibbiy sugʻurtasi jamgʻarmasi ijro etuvchi direktori vazifasida faoliyat koʻrsatib kelayotgan edi.

Shuningdek, Farxodjon Muxammadjonovich Tashpulatov Oʻzbekiston sogʻliqni saqlash vazirining oʻrinbosari lavozimiga tayinlandi.

Farxodjon Tashpulatov 1983-yilda Toshkent shahrida tugʻilgan. 2004-yilda Oʻzbekiston davlat jahon tillari universiteti, 2005-yilda Toshkent davlat iqtisodiyot universiteti qoshidagi ixtisoslashtirilgan Oliy biznes maktabini tamomlagan.

2006−2007-yillarda “Parvina sugʻurta” sugʻurta kompaniyasi Toshkent shahri direksiyasi direktori, 2007−2010-yillarda “Oʻzbekinvest Hayot” sugʻurta kompaniyasi menejeri, bosh menejeri lavozimlarida mehnat qilgan. 2011−2021-yillarda Oʻzbekiston Respublikasi Vazirlar Mahkamasida bir qancha masʼul vazifalarda ishlagan.

Farxodjon Tashpulatov 2021-yildan “Oʻzagrosugʻurta” aksiyadorlik jamiyati boshqaruvi raisining oʻrinbosari lavozimida faoliyat koʻrsatib kelayotgan edi.

Shu bilan birga, Olim Murodullayevich Omonov Oʻzbekiston sogʻliqni saqlash vazirining oʻrinbosari lavozimiga tayinlandi.

Olim Omonov 1979-yilda Samarqand viloyatida tugʻilgan. 2001-yilda Toshkent elektrotexnika aloqa instituti, 2006-yilda Toshkent axborot texnologiyalari universiteti magistratura bosqichi, 2010-yilda Oʻzbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.

2005−2011-yillarda “Oʻzbektelekom” AK “UzNet” filiali boʻlim boshligʻi, 2011−2018-yillarda Vazirlar Mahkamasida bir qancha masʼul lavozimlarda mehnat qilgan. 2018−2021-yillarda Axborot texnologiyalari va kommunikatsiyalarini rivojlantirish vazirligi tizimidagi Axborot-kommunikatsiya texnologiyalarini rivojlantirish jamgʻarmasi direktori vazifasida ishlagan.

Olim Omonov 2023-yildan “Chorvoq” turistik rekreatsion zona direksiyasi DUK direktori lavozimida faoliyat koʻrsatib kelayotgan edi.

• SSV
• Tayinlov