Ijtimoiy tarmoqlardagi O‘zbekiston milliy valyutasi – “So‘m ramzi” va Fransiyaning “In core systems” kompaniyasi logotipi o‘xshash ekani va bu plagiat mahsuli sifatida qaralishi lozimligi haqidagi qarashlar tarqatildi.

Adliya vazirligining holatga bildirgan munosabatiga ko‘ra, “In core systems” kompaniyasining belgisiga o‘xshash bo‘lgan belgilar dunyoning bir qator davlatlarida (AQSh, Kanada, Janubiy Koreya, Italiya, Germaniya va Hindiston) ham foydalanib kelinadi.

Qayd etilishicha, intellektual mulk obyektlarining huquqiy muhofazasi territorial (hududiy) harakterga ega bo‘lib, intellektual mulk obyekti maʼlum bir davlat hududida huquqiy himoyadan foydalanadi. Shu jumladan, tovar belgisi ham tegishli tartibda ro‘yxatdan o‘tkazilganidan so‘ng huquqiy muhofazaga ega bo‘ladi.

Fransiyaning “In core systems” kompaniyasi belgisi esa O‘zbekistonda tovar belgisi sifatida ro‘yxatdan o‘tmagan va muhofaza qilinmagan.

“Ushbu holatni mualliflik huquqi nuqtai nazaridan qaraydigan bo‘lsak, adabiy va badiiy asarlarni muhofaza qilish to‘g‘risida Bern konvensiyasi va milliy qonunchiligimizga muvofiq mualliflik huquqi yaratish fakti bo‘yicha yuzaga keladi va uning yuzaga kelishi hamda amalga oshirilishi uchun ro‘yxatdan o‘tkazish yoki biron-bir boshqa rasmiyatchilikka rioya etish talab qilinmaydi. Shuningdek, “Mualliflik huquqi va turdosh huquqlar to‘g‘risida”gi Qonunining 8-moddasiga muvofiq rasmiy ramzlar va belgilar (bayroqlar, gerblar, ordenlar, pul belgilari va shu kabilar) mualliflik huquqi obyektlari hisoblanmaydi”, – deyiladi vazirlik munosabatida.

Qolaversa, hozircha mazkur belgini tovar belgisi sifatida ro‘yxatdan o‘tkazish va muhofaza qilish maqsadida Intellektual mulk departamentiga murojaat qilinmagan. Ushbu belgini davlat ro‘yxatidan o‘tkazish uchun Intellektual mulk departamentiga murojaat qilinsa, holat ekspertlar tomonidan to‘liq o‘rganilib, tegishli tartibda xulosa berilishi taʼkidlanmoqda.

• Adliya
• Markaziy bank
• So‘m