Prokuratura organlari tomonidan 2019-2021-yillarda sport sohasi uchun ajratilgan byudjet mablagʻlarining maqsadli sarflanishi oʻrganildi. Unga koʻra, 464 ta sport muassasalarida jami 27 mlrd. soʻm zarar aniqlangan. Hududiy sport muassasalari tomonidan 20 ta holatda 8 mlrd. soʻmlik mablagʻ ish haqi va boshqa toʻlovlar sifatida oʻzlashtirib olingan.

Sport muassasalarini qurish-taʼmirlash ishlarida 25 ta holatda 10 mlrd. soʻm byudjet mablagʻlari oʻzlashtirilgan. Shu kabi holatda sport-taʼlim muassasalarini taʼmirlash uchun oʻtkazilgan tanlovlarda 72 ta korrupsiyaviy holatlarga yoʻl qoʻyilgan.

Sport jihozlari 8 ta holatda 4,2 mlrd. soʻm qimmat narxda sotib olingan. Aslida oʻtkazilmagan oʻquv mashgʻulot yigʻinlari oʻtkazilganligi haqida 10 ta holatda hujjatlar soxtalashtirilib, 4,3 mlrd. soʻm mablagʻ oʻzlashtirilgan.

Bosh Prokuraturaning maʼlum qilishicha, qonun buzilishi holatlari yuzasidan 1 150 ta prokuror nazorati hujjatlari qoʻllanilgan va 431 nafar shaxsning buzilgan huquqi tiklangan. 66 ta jinoyat ishi qoʻzgʻatilgan.

Eslatib oʻtamiz, oʻzlashtirilgan 27 mlrd soʻmning 10 mlrdi tegishli tartibda qaytarilgan.

• Bosh prokuratura
• Byudjet
• Sport