Seul sudi qaroriga ko‘ra, endilikda tergovchilar hokimiyatdan chetlatilgan prezident Yun Sok Yolni 20 kungacha hibsda ushlab turish imkoniyatiga ega. Bu haqda Yonhap axborot agentligi xabar bermoqda.

Ushbu muddatga u 15-yanvarda qo‘lga olinganidan so‘ng vaqtinchalik hibsxonada saqlab turilgan kunlar ham kiradi.

Korrupsiyaga qarshi kurash idorasi Yunning ishini 10 kun ichida prokuraturaga topshirishni rejalashtirgan. Prokuratura esa tergovni davom ettirib, davlat rahbari hibsda bo‘lgan davrda unga ayblov e’lon qilishi mumkin.

Ma’lumot uchun, 2024-yil 3-dekabr kuni Yun Sok Yol Janubiy Koreyada harbiy holat joriy qilish haqida e’lon qilgandan so‘ng, mamlakat parlamenti bu qarorni tezlikda bekor qildi va 14-dekabr kuni Yunga nisbatan impichment e’lon qilindi. Hokimiyatdan chetlatilgan prezident sud orderi bilan 15-yanvar kuni ikkinchi urinishda politsiya tomonidan qo‘lga olingan edi.

• Janubiy Koreya
• Prezident
• Sud