Sud zalidan IIB binosiga olib ketilgan shaxs vafot etdi. Bu haqda Toshkent viloyati IIBB xabar berdi.

Qayd etilishicha, Bekobod shahar Jinoyat ishlari bo‘yicha sudiga JKning 104-moddasi 2-qismi “ye, k, l” bandlari bilan ayblanuvchi 33 yoshli fuqaro X.Yu.ga nisbatan tergov harakatlari olib borilib, to‘plangan hujjatlar mazmunan ko‘rib chiqishlik uchun yuborilgan.

Joriy yilning 19-iyun kuni Bekobod shahar sudi tomonidan mazkur jinoyat ishini ko‘rish jarayonida, ayblanuvchi X.Yu.ning akalari ukasiga nisbatan ozodlikdan mahrum qilish jazosi tayinlangandan norozi bo‘lib, sud zalida janjal ko‘tarishgani oqibatida jamoat tartibi buzilishi yuzaga kelgan.

Jamoat tartibini tiklash va fuqarolar xavfsizligini ta’minlash maqsadida sud zaliga hududiy ichki ishlar bo‘limi xodimlari chaqirtirilgan.

Shuningdek, chaqiruvga asosan yetib kelgan uch nafar IIB profilaktika inspektorlari tomonidan janjal bartaraf qilinib, huquqbuzarlik holati yuzasidan hujjatlarni rasmiylashtirish maqsadida voqea ishtirokchilari shahar IIB binosiga olib borilgan.

Shundan so‘ng, IIB binosiga kirish yo‘lagida, fuqarolardan biri sog‘ligi yomonlashib hushini yo‘qotgan. IIB xodimlari fuqaroni xizmat avtomashinasida shahar shifoxonasiga olib borgan. Qayd etilishicha, tibbiyot birlashmasi xodimlari tomonidan ko‘rikdan o‘tkazilgan vaqtida ayblanuvchi vafot etganligi aniqlangan.

Ma’lum qilinishicha, hozirda ushbu fuqaroning o‘limi sabablariga aniqlik kiritish maqsadida sud-tibbiy ekspertizasi tayinlangan. Shuningdek, ushbu holat prokuratura organlari tomonidan nazoratga olinib, surishtiruv ishlari olib borilmoqda.

• IIB
• Sud