Buyuk Britaniyaning sobiq bosh vaziri Boris Jonson hafta oxirida amaldagi vazir Liz Trass iste’foga chiqishi va hukmron Konservatorlar partiyasi yetakchisi hamda hukumat rahbari lavozimiga saylanishga tayyorligi haqidagi taxminlar fonida mamlakatga qaytadi. Bu haqda “The Daily Telegraph” nashri xabar berdi.

Qayd etilishicha, hozirda rafiqasi bilan Dominikan Respublikasida ta’tilda bo‘lgan sobiq bosh vazir uni Dauning-stritda yana ko‘rishni istagan hamkasblaridan ko‘plab xabarlar olgan. Avvalroq, “The Times” gazetasi 6 sentyabr kuni hukumat rahbari lavozimini tark etgan Jonson Liz Trass iste’foga chiqqanidan keyin bosh vazirlik uchun kurashish niyatida ekanini ma’lum qilgandi.

“The Daily Telegraph” Trass boshqaruvdan ketganidan so‘ng bosh vazir bo‘lishga nomzodlar ro‘yxatini e’lon qildi. Yozgi saylov kampaniyasida uning asosiy raqibi bo‘lgan Rishi Sunak asosiy da’vogar bo‘lib turibdi. Nashr sobiq moliya vazirining g‘alaba qozonish imkoniyatlarini 62 foizga baholagan. Ikkinchi o‘rinda Britaniya parlamenti Jamoatchilik palatasi yetakchisi Penni Mordaunt (33,3 foiz) qayd etilgan. Jonson esa uchinchi o‘rinni egalladi: uning Dauning-stritga qaytish imkoniyati bor-yo‘g‘i 5,3 foizga baholangan.

Ta’kidlanishicha, yangi bosh vazir nomi 31-oktyabrdan kechiktirmay e’lon qilinishi rejalashtirilgan.

Qayd etish mumkin, Liz Trass 2022-yil 6-sentyabr kuni hukumat boshqaruvini egallagan bo‘lsa-da, qirolicha Yelizaveta II va yangi qirol Karl III bilan hamkorlik qilishga ulgurdi. Ya’ni mamlakat virollik tizimida o‘zgarish yuz bergan paytda aynan u Dauning-stritda edi. Bunday holat so‘nggi bor 70 yil avval yuz bergan.

Shu tariqa Trass bosh vazir lavozimida eng kam vaqt o‘tirgan siyosatchi sifatida Buyuk Britaniya tarixida qoladigan bo‘ldi.

• Boris Jonson
• Bosh vazir
• Buyuk Britaniya
• Karl III
• Liz Trass
• Parlament
• Yelizaveta II