Avvalroq joriy yil 2-mart kuni Surxondaryo viloyati Sariosiyo tumanidan oqib o‘tuvchi To‘palang daryosi qirg‘og‘idan mahalliy aholi tomonidan mis tangalar topilgani va 3-mart kuni Madaniy meros agentligi, O‘zbekiston davlat sanʼat muzeyi, Termiz arxeologiya muzeyi vakillari tomonidan mahalliy aholidan 512 dona mis tangalar belgilangan tartibda olinib, Termiz shahridagi Arxeologiya muzeyi fondiga topshirilgani haqida maʼlum qilingan edi. 

Madaniy meros agentligi, shuningdek, mazkur hudud nazoratga olingani hamda ashyolarning talon-toroj qilinishi oldini olish choralari ko‘rilayotgani haqida maʼlum qildi.

Joriy yilning 9-mart kuni ham mazkur hududdan 4 dona mis tangalar topilgan.

Maʼlum qilinishicha, prokuratura organlari tomonidan qo‘shimcha ravishda mahalliy aholi tomonidan olib qo‘yilgan 620 dona mis tanga va 1 dona shaxmat donasi ixtiyoriy ravishda olinib, muzey fondiga topshirilgan.

Bundan tashqari, viloyat prokuraturasi, madaniy meros boshqarmasi hamda arxeologiya muzeyi xodimlaridan iborat tarkibda maxsus ekspeditsiya tashkil etilgan.

Arxeologik olimlarning dastlabki xulosasiga ko‘ra, ushbu ashyolar Mirzo Ulug‘bek hukmronligi (XV asr) davrida zarb etilgan pul tangalarining shu kunga qadar topilgan eng katta va yaxshi saqlangan madaniy meros xazinasi hisoblanadi.

Hozirda ushbu manzilda qidiruv ishlari davom ettirilayotgan bo‘lib, Bosh prokuratura tomonidan nazoratga olingan. 

• Mirzo Ulug‘bek
• Surxondaryo
• Xazina