Hukumatning “Yoqilg‘i-energetika resurslarining narxlarini o‘zgartirish to‘g‘risida”gi qaror loyihasi muhokama uchun eʼlon qilindi.

Unga ko‘ra, joriy yil 1-iyuldan boshlab elektr energiyasi va tabiiy gaz uchun tariflar oshirilmoqda. Shuningdek, tabaqalashtirilgan tartibda to‘lov tizimi joriy qilinadi.

Shuningdek, mazkur hujjat loyihasi bilan korxonalarni uzoq muddatli rejalashtirishga moslashtirish, operatsion samaradorlikni va energotejamkorlikni oshirish hamda tannarxni pasaytirish uchun “perspektiv mo‘ljal”ni ko‘rsatish maqsadida joriy yil uchun yangi narxlar bilan birga 2023-yil 1-apreldan kuchga kiradigan yangi narxlarni ham tasdiqlash taklif etilmoqda.

Bunda, 2023-yil 1-apreldan quyidagi narxlar joriy etilishi ko‘zda tutilyapti:

a) Elektr energiyasi bo‘yicha:

Navoiy KMK, Olmaliq KMK va byudjet tashkilotlari uchun 800 so‘m miqdoridagi narxni saqlab qolish;

qolgan yuridik shaxslar uchun – 700 so‘m (2022-yil 1-iyuldan 600 so‘m).

b) Tabiiy gaz bo‘yicha:

issiqlik elektr stansiyalari uchun – 1 200 so‘m (2022-yil 1-iyuldan 1000 so‘m);

Navoiy KMK, Olmaliq KMK va byudjet tashkilotlari uchun – 1 350 so‘m (2022-yil 1-iyuldan 1350 so‘m);

avtomobillarni gaz bilan to‘ldirish kompressor stansiyalari uchun – 1 400 so‘m (2022-yil 1-iyuldan 1200 so‘m);

qolgan yuridik shaxslar uchun – 1 350 so‘m (2022 yil 1 iyuldan 1150 so‘m) etib belgilash.

Qayd etilishicha, 2023-yil 1-apreldan o‘rnatiladigan yoqilg‘i-engergetika resurslarining narxlari 2024 va 2025-yillarda faqatgina inflyatsiya darajasiga indeksatsiya qilib boriladi.

2026-yildan boshlab esa elektr energiyasi, tabiiy va suyultirilgan gazning ulgurji bozoriga o‘tiladi hamda narxlar erkin shakllanadi.

• Elektr energiyasi
• Gaz
• Loyiha
• Narx-navo