Joriy yil 10-yanvar kuni Prezident Shavkat Mirziyoyev qurilish, yo‘l infratuzilmasini yaxshilash va tabiiy gaz ta’minotiga oid loyihalar bilan tanishdi. Bu haqda Prezident matbuot xizmati ma’lum qildi.

Taqdimotda tabiiy gaz yetkazib berish tizimida xususiy sheriklikni joriy etishga doir takliflar ham ko‘rib chiqildi.

Jumladan, Jizzax shahri gaz ta’minoti tizimini isloh qilish, mazkur sohaga DXSHni joriy etish masalasi ham ko‘tarildi.

Prezidentga qilingan taqdimotga ko‘ra, Turkiyaning “Aksa Doğalgaz” kompaniyasi bilan Jizzax shahri gaz ta’minoti tizimiga davlat xususiy sherikchilik mexanizmini joriy etish rejalashtirilmoqda.

Taqdimotda bu tizimni modernizasiya qilish juda dolzarb ekanligi, chunki ayni paytda gaz quvurlarining yarmidan ko‘pi – 45 ming kilometri o‘ttiz yildan ortiq ishlatilishi oqibatida yo‘qotishlar miqdori 20 foizdan oshib ketayotgani qayd etildi.

Ma’lum qilinishicha, bugungi kunda Jizzax shahar gaz ta’minoti tizimida 767 kilometr quvur, 6 ta gaz taqsimlash stansiyasi, 1 ming 600 dan ziyod gaz taqsimlash punkti bor. Ushbu tizimni xalqaro standartlar asosida va to‘g‘ridan-to‘g‘ri investitsiyalar jalb qilish orqali modernizatsiya qilish bo‘yicha loyiha ishlab chiqilgan.

Texnik ustuvor yechimlardan foydalanib amalga oshiriladigan loyiha doirasida eski gaz quvurlari olib tashlanib, 1 ming 500 kilometrdan ziyod yangi quvurlar tortilishi rejalashtirilgan. 

“Shuningdek, gaz taqsimlash stansiyalari soni 6 tadan 2 tagacha qisqartirilib, 3 bosqichli tizimdan 2 bosqichli tizimga o‘tiladi. Natijada hozirgi  holatdagi 115 million kub metr yo‘qotishlar bartaraf etiladi”, – deyiladi Prezident matbuot xizmati xabarida.

• Gaz
• O‘zbekiston