Ijtimoiy tarmoqlarda Tailand Qirolligining Pxuket orolida sodir bo‘lgan kater halokati va undagi O‘zbekiston Respublikasi fuqarolari haqida tarqalgan xabarlar yuzasidan TIV matbuot kotibi Axror Burxanov ma’lumot berdi.

Hodisa 11-yanvar kuni sodir bo‘lgan. Tarqalgan xabarlarda kater baliqchi trauleri bilan to‘qnashishi oqibatida ag‘darilib, cho‘kib ketgani va unda 18 yoshli rossiyalik ayol halok bo‘lgani aytilgan. Shuningdek, yana 23 nafar rossiyalik sayyoh kasalxonaga yotqizilgan.

Bortda 3 nafar O‘zbekiston fuqarosi ham bo‘lgan. Halokatda ularning 2 nafari yengil tan jarohati olib, mahalliy shifoxonaga yotqizilgan. Jabrlangan fuqarolar to‘liq sog‘aygan va belgilangan tartibda shifoxonadan chiqarilgan.

Shu bilan birga, jabrlanganlarning barcha tibbiy va boshqa zarur xarajatlari katerga egalik qiluvchi kompaniyaning sug‘urta mablag‘lari hisobidan to‘liq qoplangan.

Vaziyat yuzasidan Pxuket va Krabi provinsiyalari politsiyasi tergov ishlarini tashkillashtirgan, uning sabablari o‘rganilmoqda. O‘zbekiston Respublikasining Bangkok shahridagi Bosh konsulxonasi mahalliy huquqni muhofaza qiluvchi organlar hamda sog‘liqni saqlash muassasalari bilan doimiy aloqada bo‘lib kelgani aytildi.

• Bayonot
• Jarohatlar
• O‘zbekistonlik
• TIV
• Tailand
• fuqaro