22°
Kechasi 10°
Oliy taʼlim muassasalari talabalarining davlat idoralarida haq to‘lanadigan stajirovka o‘tashi to‘g‘risidagi tartib ishlab chiqilmoqda. Bu haqdagi hujjat loyihasi jamoatchilik muhokamasi uchun eʼlon qilingan.
Qayd etilishicha, mazkur tartib Mehnat kodeksi hamda “Taʼlim to‘g‘risida”gi qonunga muvofiq oliy taʼlim muassasalari (harbiy, maxsus oliy taʼlim muassasalaridan tashqari) talabalarining davlat idoralarida haq to‘lanadigan stajirovka o‘tash tartibini belgilaydi.
Hujjat loyihasiga muvofiq stajirovka davomiyligi magistratura talabalari uchun ikkinchi yoki uchinchi semestrni tugatganidan so‘ng uch yarim oy, bakalavriat talabalari uchun esa to‘rtinchi semestrni tugatganidan keyin bir oy etib belgilanadi.
Stajirovka dasturi (reja-jadvali) stajirovka boshlanishidan kamida bir oy oldin qabul qiluvchi tashkilotning stajirovka menejeri bilan kelishilgan holda amalga oshiriladi.
Qabul qiluvchi tashkilotda stajyorlarni ishga qabul qilish tashkilotda mavjud bo‘lgan bo‘sh (vakant) ish o‘rinlari (lavozimlari) uchun yoki o‘rindoshlik asosida egallab turilgan ish o‘rinlari (shtat lavozimlari) uchun amalga oshiriladi.
Stajyor uchun sinov muddati belgilanmaydi. Uning ish vaqti davomiyligi haftasiga 36 soatdan oshmasligi kerak (istisno hollarda 40 soat).
Stajyorlarning mehnatiga haq to‘lash qabul qiluvchi budjet tashkiloti tomonidan bo‘sh (vakant) ish o‘rinlari hisobidan shakllantirilgan mehnatga haq to‘lash fondining tejalgan mablag‘lari hisobidan, byudjetdan tashqari tashkilotlarda esa – o‘z mablag‘lari hisobidan amalga oshiriladi.
Davlat tashkilotlarida stajirovkadan o‘tayotgan stajyorlarning mehnatiga haq to‘lashda:
– magistraturada tahsil olayotgan stajyorlar uchun – stajirovka boshlangan kunida belgilangan eng kam ish haqining bir yarim baravari miqdorida;
– bakalavriatda tahsil olayotgan stajyorlar uchun – stajirovka boshlangan kunida belgilangan eng kam ish haqi miqdorida belgilanadi.
Shuningdek, stajirovka davrida talabalarga stipendiyalar umumiy belgilangan tartibda to‘lanadi.
Maʼlumot uchun, stajyorlarning mehnatiga haq to‘lash bo‘yicha smeta xarajatlari yiliga 178,5 mlrd. so‘m, shu jumladan, magistrlar uchun 42,8 mlrd so‘m, bakalavrlar uchun 135,7 mlrd. so‘mni tashkil etadi
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
