Oliy ta’lim vazirligining ma’lum qilishicha, to‘lov-kontrakt asosida talabalikka tavsiya etilgan abituriyentlar uchun to‘lovlarni amalga oshirish muddati uzaytirilishi kutilmoqda.

Vazirlikka ko‘ra, to‘lov-kontrakt asosida talabalikka tavsiya etilgan abituriyentlar hamda o‘qishini bir oliy ta’lim muassasasidan boshqa oliy ta’lim muassasasiga ko‘chirayotgan talabalar va ularning ota-onalari murojaatlari inobatga olinmoqda va bu bo‘yicha vazirlik tomonidan tegishli takliflar tayyorlangan.

Eslatib o‘tamiz, Davlat komissiyasining tegishli yig‘ilish bayoniga asosan respublikadagi davlat oliy ta’lim muassasalari bakalavriati va magistraturasiga to‘lov-kontrakt, shu jumladan tabaqalashtirilgan to‘lov-kontrakt asosida talabalikka tavsiya etilgan abituriyentlar uchun to‘lovlarni amalga oshirish muddati 2021-yilning 20-noyabr sanasi etib belgilangan edi.