Bosh prokuratura huzuridagi Departamentning Bag‘dod tumani bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqaro R.Q. 2 nafar fuqaroning ishonchiga kirib, ularni yuqori lavozimda ishlovchi tanishlari yordamida 4 000 AQSh dollari va 30 mln so‘m evaziga ichki ishlar organlariga ishga kiritib qo‘yishini aytib, oldindan 30 mln so‘mni olgan vaqtida yoshviy dalillar bilan ushlangan.

Shu kabi, Departamentning Qashqadaryo viloyati boshqarmasi tomonidan o‘tkazilgan tezkor tadbirda fuqaro Sh.P. fuqaro S.Q.ni yuqori lavozimda ishlovchi tanishlari yordamida Kasbi tuman tibbiyot birlashmasiga hamshiralik vazifasiga ishga kiritib qo‘yish evaziga 1 000 AQSh dollarini olgan vaqtida ushlanib, uning ko‘rsatuviga asosan davom etgan tadbirda ushbu tibbiyot birlashmaning xo‘jalik bo‘limi mudiri K.Ch. fuqaro Sh.P.dan 1 000 AQSh dollarini olgan vaqtida ashyoviy dalillar bilan ushlangan.

Departamentning Bekobod shahar bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda esa, fuqaro D.J. fuqaro Z.K.ni tanishlari yordamida “O‘zmetkombinat” AJ ichki qo‘riqlash xizmatiga qo‘riqchi vazifasiga ishga kiritib qo‘yish evaziga 700 AQSh dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Departament
• Pora
• Qashqadaryo
• Toshkent viloyati