Samarqand shahrida joylashgan Kongress markazida Turkiy davlatlar tashkiloti sammiti doirasida Oʻzbekiston Respublikasi Tashqi ishlar vaziri Vladimir Norov va Turkiy davlatlar tashkiloti sobiq Bosh kotibi Bagʻdod Amreyev ishtirokida matbuot anjumani oʻtkazildi.

Vladimir Norov Turkiy davlatlar tashkiloti sammiti yakunlari boʻyicha maʼlumot berdi.

“Muzokaralar yakunlari boʻyicha 10 dan ortiq koʻp tomonlama hujjat qabul qilindi. Bu esa tashkilot faoliyatining istiqbolli yoʻnalishlari boʻyicha hamkorlikni sifat jihatidan yangi amaliy mazmun bilan toʻldirishga xizmat qiladi.

Turkiy investitsiya fondini qisqa muddatlarda tashkil etish toʻgʻrisidagi bitim va Transport bogʻliqligi dasturi imzolandi. Bu esa transport-logistika sohasidagi hamkorlikni yanada chuqurlashtirish uchun yangi imkoniyatlarni yaratadi”, dedi Norov.

Tashqi ishlar vaziri sammit yakunida Bagʻdod Kultayevich Amreyevning Bosh kotiblik vakolati tugagani taʼkidlab, davlat rahbarlari uning Turkiy davlatlar tashkiloti doirasidagi hamkorlikni mustahkamlashda gʻayratli va samarali faoliyat koʻrsatgani uchun minnatdorchilik bildirganlarini qayd etdi.

Vladimir Norov Bagʻdod Amreyevga yangi ishlarida muvaffaqiyatlar, Bosh kotib Kubanichbek Omuraliyevning kelgusidagi faoliyatiga zafarlar tiladi.

• Matbuot anjumani
• Samarqand
• Turkiy davlatlar tashkiloti
• Vladimir Norov
• sammit