Ijtimoiy tarmoq vositalarida “Permdagi o‘zbek diasporasi rahbari shaxsan o‘z vatandoshlarini Ukrainaga urushga jalb qilyapti” sarlavhali videolar tarqaldi. Unda Jahongir Jalolov ismli odam o‘zbekistonlik mehnat muhojirlariga murojaat qilib, o‘zbeklar “o‘zlari yegan nonni oqlashga majbur” ekanini aytadi. Tashqi ishlar migratsiyasi agentligi ushbu holatga munosabat bildirdi.

“Bizning farzandlarimiz shu yurt bog‘chalariga, maktablariga, kollejlariga qatnashadi. Biz shu yerda yashayapmiz, non topyapmiz. Taklifim shuki, biz “Amir Temur” nomi bilan maxsus batalon yaratib, Ukrainadagi maxsus harbiy operasiyada qatnashishimiz va rus hukumatiga Ukrainani denatsifikatsiya va demilitarizatsiya qilish ishlarida yordam berishimiz kerak”,— deydi u.

Tashqi ishlar migratsiyasi agentligi ushbu holatga munosabat bildirib, fuqarolardan bunday da’vatlarga ergashmaslikni so‘ragan.

 “O‘zbekiston fuqarolaridan bunday da’vatlarga ergashmaslikni, ziddiyatli hududlarga bormaslikni va harbiy harakatlarda ishtirok etmaslikni so‘raymiz”,— deyiladi agentlik xabarida.

Eslatib o‘tamiz, O‘zbekiston Respublikasi Jinoyat kodeksining 154 prim 1-moddasida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanishi ko‘zda tutilgan.

• Migratsiya
• Munosabat
• Ogohlantirish