Oliy sud matbuot xizmatining xabar berishicha, bugun, 17-iyul kuni Toshkent viloyat sudida 2002-yilda Toshkent shahrida tug‘ilgan yigitga oid jinoyat ishi uning himoyachilari tomonidan jinoyat ishlari bo‘yicha Oqqo‘rg‘on tuman sudining 8-maydagi hukmi ustidan berilgan apellyatsiya shikoyatlariga asosan apellyatsiya tartibida ko‘rib chiqish bo‘yicha ochiq sud jarayoni yakunlandi.

Unga ko‘ra, Toshkent viloyat sudi jinoyat ishlari bo‘yicha sudlov hay’ati apellyatsiya instansiyasining ajrimi bilan birinchi instansiya sudining ayblanuvchiga nisbatan chiqarilgan hukmi o‘zgarishsiz, shikoyatlar esa qanoatlantirilmasdan qoldirildi.

Qayd etilishicha, ushbu ajrim ustidan Oliy sudning Jinoyat ishlari bo‘yicha sudlov hay’atiga kassatsiya tartibida shikoyat berilishi yoki protest bildirilishi mumkin.

Ma’lumot uchun, 21 yoshli Jahongir Ulug‘murodov 2022-yilda sinfdoshlari mavjud Telegram guruhiga YouTube’dagi diniy qo‘shiq – nashida uchun havola yuborgan. Nashida Din ishlari bo‘yicha qo‘mitaning xulosasi bilan "aqidaparastlik g‘oyalari bilan yo‘g‘rilgan" deb topilgan. Natijada ayblanuvchiga nisbatan 3 yilga ozodlikdan mahrum qilish jazosi tayinlangan.

• Oliy sud