Avvalroq, Toshkentdagi “Malika” bozorida sotuvchilar noqonuniy IMEI ro‘yxatdan o‘tkazish narxlarini 250 dollargacha oshirib yuborgani haqida xabarlar tarqalgan edi.

Mobil qurilmalarni IMEI-kodi orqali ro‘yxatdan o‘tkazish xizmat haqi sun’iy oshirilayotgani yuzasidan raqamli texnologiyalar vaziri Sherzod Shermatov nomiga senator so‘rovi yuborildi.

2019-yildan buyon mobil qurilmalarni IMEI-kodi orqali ro‘yxatdan o‘tkazish amaliyoti joriy etilgan, 2024-yildan esa ularni O‘zbekistonga olib kirishda majburiy deklaratsiya to‘ldirish talab etiladi. Agar deklaratsiya to‘ldirilmasa, qurilmani UZIMEI tizimida ro‘yxatdan o‘tkazish uchun bojxona qiymatining 30 foizi miqdorida to‘lov belgilangan.

So‘rovga ko‘ra, uzimei.uz, my.gov.uz saytlari va “Birda” ilovasi orqali ro‘yxatdan o‘tkazish imkoniyati cheklangani tufayli ayrim hollarda xizmat haqi sun’iy oshirilmoqda.

Shuningdek, ikkinchi SIM-karta uchun IMEI2-kodni alohida ro‘yxatdan o‘tkazish va buni faqat qurilmani avval ro‘yxatdan o‘tkazgan joyda amalga oshirish talabi fuqarolar uchun qo‘shimcha murakkablik va xarajatlarni yuzaga keltirmoqda.

Shu sababli vazirdan uzimei.uz va my.gov.uz platformalari hamda “Birda” mobil ilovasidagi texnik muammolarni bartaraf etish, IMEI2-kodni ro‘yxatdan o‘tkazish, shuningdek, UZIMEI tizimida mavjud byurokratik talablarni yumshatish bo‘yicha amalga oshirilayotgan ishlar haqida 10 kun ichida ma’lumot taqdim etishi so‘ralgan.

• Imei
• Senat
• So‘rovnoma
• Telefon