Qozog‘iston janubidagi Turkiston shahrida joylashgan Ahmad Yassaviy maqbarasini portlatishga urinish mamlakat Milliy xavfsizlik qo‘mitasi xodimlari tomonidan to‘xtatib qolindi. Bu haqda 8-sentabr kuni Shanxay hamkorlik tashkiloti Mintaqaviy aksilterror tuzilmasi kengashi yig‘ilishida qo‘mita raisi o‘rinbosari Ruslan Seysembayev ma’lum qildi.

Qayd etilishicha, so‘nggi uch yil davomida ShHT davlatlari hududida kamida 80 ta terakt sodir etilgan. Joriy yil esa qo‘poruvchilik harakatlari keskin oshgan.

“Bu davrda Qozog‘istonning o‘zida ham terrorchilik xavfi kuchaymoqda. Har yili kamida ikkita teraktning oldi olinyapti. Faqat shu yilning o‘zida Turkistonda Xo‘ja Ahmad Yasaviy maqbarasida qo‘lbola portlovchi qurilmani ishga tushirishga urinishlar tayyorgarlikning dastlabki bosqichida to‘xtatildi, shuningdek, Ostonadagi odamlar gavjum joylarda qurolli hujum uyushtirilishining oldi olindi”, deydi Seysembayev.

Uning so‘zlariga ko‘ra, Shanxay Hamkorlik Tashkilotiga a’zo davlatlar uchun terrorchilik tahdidlarining shakllanishi bir necha dominant omillar ta’sirida sodir bo‘ladi.

Terrorchilar ko‘z tikkan Turkiston shahridagi Ahmad Yassaviy maqbarasi nafaqat Qozog‘iston, balki butun Markaziy Osiyo uchun qadrli ziyoratgoh sanaladi.

• Qozog‘iston
• ShHT
• Terrorizm