Tesla zanglamas kiberhushtagini hali sotishni boshlab ulgirmay, boshqa jiddiyroq mahsulotini namoyish qildi. Kompaniya bu safar bolalar uchun butunlay elektrda harakatlanuvchi Cyberquad for Kids kvadrotsiklini taqdim etdi. Kvadrotsikl 8 yoshdan oshgan bolalarga mo‘ljallangan.

Cyberquad elektr quvvat qurilmasi orqali harakatga keladi. Maksimal tezlik soatiga 16 km bilan chegaralangan, to‘la quvvat 25 km masofani bosishga yetadi. Kvadrotsikl to‘liq quvvat olishi uchun 5 soat vaqt talab etiladi.

Kvadrotsiklni Teslaning sayti orqali buyurtma qilish mumkin, uning narxi 1,9 ming AQSh dollari (hozirgi kurs bilan 20 mln 496 ming so‘m) etib belgilangan.

Kvadrotsikl xaridorlar qo‘liga yarim tayyor holda yetkaziladi. Xaridor komplektatsiyaga qo‘shib beriladigan asbob-uskuna va qo‘llanma orqali oxirigacha yig‘ib olishi kerak.

• Elektromobil
• Tesla
• texnologiya