Tibet janubi-g‘arbidagi Ningchi shahrida qor ko‘chkisi oqibatida kamida 28 kishi halok bo‘ldi. Bu haqda Xitoyning “Xinxua” axborot agentligi xabar berdi.

Qayd etilishicha, qutqaruvchilar qor ostidan 8 nafar odamning jasadini topishgan. Keyinchalik yana 20 kishining halok bo‘lgani, 8 kishi esa bedarak yo‘qolgani ma’lum bo‘ldi.

Voqea joyida qidiruv-qutqaruv ishlari 20-yanvar kuni yakunlangan. Unda jami 1348 kishi, jumladan, o‘t o‘chiruvchilar, harbiylar va ko‘ngillilar hamda 236 ta texnika ishtirok etdi. Ular birgalikda jabrlanganlarni qor ostidan qutqarish uchun 7,5 kilometrlik o‘tish joyiga asfalt yotqizilgan. Qutqaruvchilar 53 kishini saqlab qolishga muvaffaq bo‘lgan, biroq ularning besh nafari og‘ir tan jarohati olgan.

Qor ko‘chkisi dastlab 17-yanvar kuni kechqurun sodir bo‘lgan va Tibet avtonom viloyatidagi avtomobil tunneliga kirish joylarini berkiitib qo‘ygan. Natijada odamlar mashinalar ichida qolib ketgan. Favqulodda xizmatlar ma’lumotlariga ko‘ra, qor ko‘chishiga mintaqada kuchli shamol va havo haroratining ko‘tarilishi sabab bo‘lgan.

• Qor
• Tibet