Joriy yilning 25-dekabr kuni "Humo Arena" kompleksida bo‘lib o‘tishi e’lon qilingan "Tik Tok Fest" shou-konsert dasturi bekor qilindi. Ijtimoiy tarmoqlarda turli tanqidiy-tahliliy mulohazalarga sabab bo‘lgan festival chiptalari sotuvi iticket.uz saytidan olib tashlangan.

Shu bilan bir qatorda ijtimoiy tarmoqlardagi tanqidiy mulohazalarga nisbatan Madaniyat vazirligi ham rasmiy bayonot bilan chiqdi. Unda vazirlik odamlarning noroziligiga sabab bo‘lgan shou-konsert dasturiga aloqasi yo‘qligini iddao qilgan. 

"O‘zbekiston Respublikasi Prezidentining PF-6044-son Farmoni 2-ilovasi 32-bandiga muvofiq, konsert-tomosha tadbiriga bir martalik ruxsatnoma berish vakolatli bo‘lgan – Ichki ishlar vazirligi, Mahalliy ijroiya hokimiyati organlari tomonidan amalga oshiriladi. Shu asosda, konsert-tomoshalarning saviyasi, mazmun-mohiyati, g‘oyasini tahlil qilish, tomosha bo‘yicha yakuniy xulosalar berish ham Mahalliy ijroiya hokimligi huzurida tashkil etilgan tuzilmaning vazifasi hisoblanadi", – deyiladi bayonotda.

Bundan tashqari, yuqoridagi kabi shou-konsert tomoshalarini tashkil etish Madaniyat vazirligi tomonidan emas, xususiy tadbirkorlar tomonidan amalga oshiriladi.

Vazirlik axborot xizmati mamlakat hududida tashkil etilayotgan konsertlar, tadbirlar, shou-tomoshalar, festivallarda millat mentaliteti hisobga olinib uyushtirilishi kerakligini qayd etadi.

Eslatib o‘tamiz, bekor qilingan "Tik Tok Fest" uchun chipta narxlari 100 ming so‘mdan 750 ming so‘mgacha qilib belgilangandi. Sotib olingan chiptalar bir muddat ichida qaytarilishi aytilmoqda.

• Madaniyat
• Toshkent
• Vazirlik