TikTok Buyuk Britaniyaning maʼlumotlarni nazorat qiluvchi tashkiloti tomonidan bolalar shaxsiy hayotini himoya qilmagani uchun 12,7 million funt sterling miqdorida jarimaga tortildi.

Hisob-kitoblarga koʻra, TikTok 2020-yilda 13 yoshgacha boʻlgan 1,4 millionga yaqin Britaniya bolalariga platformadan foydalanishga ruxsat bergan.

Axborot komissiya boshqarmasi (ICO) tomonidan oʻtkazilgan tergovga koʻra, ijtimoiy tarmoq ushbu yoshdagi bolalarning maʼlumotlaridan ota-onalarning roziligisiz foydalangan.

Qayd etilishicha, TikTok hisob qaydnomasini yaratish uchun minimal yosh sifatida 13 yoshni belgilaganiga qaramay, bu yoshdagi koʻpchilik bolalar saytga kirishga muvaffaq boʻlishgan.

Bu holatda, bolalarning maʼlumotlari ularni kuzatish va profillash hamda ularga zararli yoki nomaqbul kontentni taqdim etish uchun ishlatilgan boʻlishi mumkin.

“Farzandlarimiz raqamli dunyoda jismoniy dunyoda boʻlgani kabi xavfsiz boʻlishiga ishonch hosil qilish uchun qonunlar mavjud. TikTok bu qonunlarga rioya qilmadi”, – deydi axborot komissari Jon Edvards.

Maʼlum qilinishicha, TikTok jarima miqdori boʻyicha shikoyat qilish huquqiga ega va bu muvaffaqiyatli boʻlsa, yakuniy jarima miqdori kamaytirilishi mumkin.

• Buyuk Britaniya
• TikTok