Dekabr oyida Jeyms Kemeron to‘liq ilmiy tadqiqot olib borgani hamda “Titanik”dagi Rouz va Jek birga qochib qutula olmasligini isbotlaganini ta’kidladi. Ammo, ma’lum bo‘lishicha, rejissyor biroz ayyolik qilgan.

“National Geographic” telekanalida efirga uzatiluvchi ko‘rsatuvning navbatdagi maxsus sonida ushbu tadqiqot batafsil tahlil qilinadi va u yerda Kemeron bosh qahramonlarning har ikkisi uchun ham omon qolish yo‘lini topgani haqida gap boradi.

Dastlabki izlanishlarida rejissyor Jek va Rouz parametrlariga ega bo‘lgan kaskadyorlar yordamida haqiqatdan ikkala qahramon ham taxta bo‘lagiga sig‘masligini isbotladi – u suv ostida qolib ketadi. Biroq, agar Rose o‘zining qutqaruv ko‘ylagini Jek uchun berganida, u qayiqlar kelgunicha bir necha soat suv yuzasida qolishi mumkin edi – hatto muzlagan suv sharoitida ham.

Buni sinab ko‘rish uchun Kemeron kaskadyorlarni Rouz va Jek filmda ijro etgan barcha mashaqqatli harakatlarni bajarishga majbur qildi, shunda ular yetarlicha charchagan va keyin ijrochilar bir xil pozisiyalarni egallashdi – taxta bo‘lagida va uning yonida, xuddi shunday sovuq suvda.

“Qutqaruvchi qayiq kelguniga qadar u chiday olardi. Jek omon qolishi mumkin edi, lekin ko‘p o‘zgarishlar qilishga to‘g‘ri kelardi. Men uni (Rouz) ni xavf ostiga qo‘yadigan hech narsa qilmasdim va bu qahramonning xarakteriga 100 foiz mos keladi”, – deydi 68 yoshli Jeyms Kemeron.

Oddiy qilib aytganda, agar Jek Dousonning o‘zida qutqaruv nimchasi bo‘lganida, “Titanik” filmining oxiri bunchalik qayg‘uli yakunlanmagan bo‘lar edi.

“Titanik: Jeyms Kemeron bilan 25 yil o‘tib” deya nomlangan ushbu maxsus ko‘rsatuv kecha, 5-fevral kuni “National Geographic” kanalida namoyish etilgan.

Qayd etish mumkin, “Titanik” 1997-yilda rejissyor Jeyms Kemeron tomonidan suratga olingan, afsonaviy Titanik laynerining cho‘kishi tasvirlangan amerika filmi. Turli ijtimoiy qatlamlar vakillari bo‘lgan film qahramonlari 1912-yilda Atlantika okeani bo‘ylab birinchi va oxirgi sayohatini amalga oshirgan layner bortida bir-birlarini sevib qolishadi. Bosh rollarni Leonardo Di Kaprio va Keyt Uinslet ijro etgan.

Loyiha byudjeti 200 million AQSH dollarini tashkil etgan va bu o‘z davri uchun rekord summadir. “Titanik” 1 milliard dollarlik marrani bosib o‘tgan birinchi, 2 milliard dollarlik marrani bosib o‘tgan ikkinchi film hisoblanadi. U dunyo bo‘ylab 2,2 milliard dollardan ortiq daromad keltirgan.

“Titanik” 1997- yil yakuni bo‘yicha 14 ta “Oskar” mukofotiga nomzod bo‘lib, shulardan 11 tasida, jumladan "Eng yaxshi film" mukofotini qo‘lga kiritgan.

• Oskar
• Titanik
• gollivud