Tojikiston prezidenti Imomali Rahmon qizi Ruxshona Imomalini Buyuk Britaniya va Shimoliy Irlandiya Birlashgan Qirolligiga elchi etib tayinladi. Bu haqidagi farmon joriy yil 15-dekabr kuni davlat rahbari saytida e’lon qildi.

Shu paytgacha Londondagi elchixonani Mas’ud Xalifazoda boshqarib kelayotgan edi.

Ruxshona Imomali prezidentning yetti qizidan biri bo‘lib, 2017-yildan shu paytgacha Tashqi ishlar vazirligi xalqaro tashkilotlar boshqarmasi boshlig‘i o‘rinbosari lavozimida faoliyat ko‘rsatib kelayotgan edi. U avval Tojikistonning Buyuk Britaniyadagi elchixonasida ishlagan. U yerda, Londonda uning turmush o‘rtog‘i Shamsullo Sohibov Tojikistonning savdo vakili edi. Ruxshona Imomali “Diplomatik xizmat asoslari” kitobi muallifi.

Imomali Rahmonning yana bir qizi Ozoda Rahmon ham Tashqi ishlar vazirligida ishlagan – u Konsullik boshqarmasi boshlig‘i, vazir o‘rinbosari, keyin esa boshqarma boshlig‘ining birinchi o‘rinbosari bo‘lgan. 2016-yildan beri prezident ijroiya apparatini boshqarib kelmoqda. Davlat rahbarining to‘ng‘ich o‘g‘li Rustam Imomali Majlisi Milliy (parlament yuqori palatasi) spikeri va Dushanbe hokimi lavozimlarini egallab turibdi.

Ma’lumotlarga ko‘ra, Prezidentning kuyovlari ham yuqori lavozimlarda ishlaydi. Ozoda Rahmonning turmush o‘rtog‘i Jamoliddin Nuraliyev Tojikiston Milliy banki raisining birinchi o‘rinbosari hisoblanadi. Yana bir kuyovi Ashraf Gulov joriy yilning iyul oyida Tojikistonning Turkiyadagi elchisi etib tayinlangan edi.

• Tojikiston