Bugun, 13-mart kuni Tojikiston va Qirg‘iziston prezidentlari Imomali Rahmon va Sadir Japarov Qirg‘iziston Respublikasi hamda Tojikiston Respublikasi o‘rtasida Bishkekda Davlat chegarasi to‘g‘risidagi shartnomani imzoladi. Bu haqda Tojikiston prezidenti matbuot xizmati xabar berdi.

Ma’lum bo‘lishicha, hujjat Qirg‘izistonning “Birdamlik markazi” davlat qarorgohida Tojikiston prezidentining Qirg‘iziston poytaxtiga davlat tashrifi doirasida imzolangan.

“Bugun biz mamlakatlarimiz o‘rtasidagi chegara masalalari bo‘yicha tarixiy qarorni qabul qilmoqdamiz”, – degan Imomali Rahmon.

Uning so‘zlariga ko‘ra, mazkur shartnoma davlatlararo munosabatlarni yanada kengaytirish uchun mustahkam asos yaratadi.

Sadir Japarov ham Tojikiston-Qirg‘iziston chegarasining delimitatsiyasi va demarkatsiyasi bo‘yicha hukumat komissiyalarining samarali faoliyatini alohida ta’kidlagan.

Imomali Rahmon yaqin kunlarda Xo‘jandda Tojikiston, Qirg‘iziston va O‘zbekiston davlat chegaralarining tutash nuqtasi bo‘yicha kelishuv imzolanishi rejalashtirilganini ham ma’lum qilgan.

Ma’lumot uchun, ikki mamlakat chegarasi 2021-yilning may oyida qurolli to‘qnashuv oqibatida yopilgan edi. Mamlakatlar o‘rtasida chegarani delimitatsiya qilish bo‘yicha muzokaralar 2002-yil dekabr oyidan buyon davom etmoqda. Ushbu masalaning hal etilmagani ikki davlat aholisi va harbiylari ishtirokidagi doimiy mojarolarga sabab bo‘lib kelgan, ularda o‘qotar qurollar ham ishlatilgan.

• Chegara
• Prezident
• Qirg‘iziston
• Tojikiston
• shartnoma