Afg‘onistonning Jauzjon viloyati Qushtepa tumanida etnik kamchilik bo‘lmish o‘zbek va turkmanlar toliblar tomonidan uylaridan quvib chiqarilmoqda. Qurollangan toliblar bu safar qat’iy harakat qilmoqda, voqea joyida otishma sodir bo‘lgan. Oqibatda jangarilar ularga bo‘ysunishni istamagan bir necha tinch aholi vakillarini yaralagan.

 Aamaj News nashrining xabar berishicha, bir necha kishi toliblar tomonidan xibsga olingan va olib ketilgan.

Xuddi shu holat bir hafta oldin ham ro‘y bergandi. Joriy yilning 29-noyabrida Qushtepa tumanidagi o‘zbek va turkmanlar, toliblar ko‘magi bilan ko‘chmanchilar ularning uylaridan quvib chiqarayotgani haqida xabar qilgandilar.

Aytilishicha, ularning nafaqat turar joylari, traktor va mashinalari ham olib qo‘yilgan. Qarshilik qilganlarni esa toliblar ushlab kaltaklagan.

Ammo voqeani toliblar matbuot kotibi o‘rinbosari Inamulla Samangoniy rad etgandi. U Qushtepa tumani mahalliy polisiyasi rahbari Sirojiddin Ahmadiyning so‘zlarini keltirib, bunday holat ro‘y bermaganini qayd etgan.

• Afg‘oniston
• Toliblar
• o‘zbek