“Tolibon” tomonidan tuzilgan Afgʻoniston hukumatining Bosh vazir oʻrinbosari Mavlaviy Abdul Kabir Qobul Anqaraning yordamiga muhtoj ekanligini taʼkidlagan. Bu haqida “Tolibon” vakili Turkiyaning Qobuldagi elchisi Jihod Erginay bilan uchrashuvda aytib oʻtgan.

Abdul Kabirning soʻzlariga koʻra, Qobul Anqaradan Afgʻoniston iqtisodiyotiga faol sarmoya kiritishini kutmoqda.

“Mamlakatlarimiz oʻrtasida uzoq yillardan buyon doʻstona munosabatlar oʻrnatilgan va bu quvonarli. Turkiya muvofiqlashtirish va hamkorlik agentligining (TIKA) Afgʻonistondagi faoliyatini yuqori baholaymiz”, — degan Bosh vazir oʻrinbosari.

Shuningdek, Abdul Kabir ayollar ahvoliga ham eʼtibor qaratib, afgʻon ayollari koʻplab sohalarda ishlashda davom etayotganligi, qizlar 2022-oʻquv yilidanoq maktabda oʻqishga kirishishini bildirgan.

Oʻz navbatida, turk diplomati Jihod Erginay Anqara Turk Qizil yarim oy jamiyati va turli nodavlat tashkilotlari orqali Afgʻonistondagi muhtoj oilalarga yordam koʻrsatayotganini eslatib oʻtgan.

Xabarda keltirilishicha, elchi TIKAʼning Afgʻonistondagi faoliyati haqida ham maʼlumot berib, Turkiyaning Qishloq xoʻjaligi vazirligini urugʻlik bugʻdoy bilan taʼminlaganligini taʼkidlagan. “Turk ishbilarmonlari Afgʻonistonga sarmoya kiritmoqchi va bir guruh tadbirkorlar yaqin haftalarda Qobulga kelishi rejalashtirilgan”, — deya maʼlum qilgan Turkiyaning Qobuldagi elchisi.

• Toliblar
• Turkiya