O‘zbekiston tashqi ishlar vaziri Vladimir Norov o‘zining tvitter sahifasida Tolibon hukumatining mamlakat oliy o‘quv yurtlariga qabul kvotalarini qariyb 70 foizga oshirilishi haqidagi qaroriga yuqori baho berdi.

Norovning qayd etishicha, 2021-yilda Afg‘onistondagi OTMlarga qabul kvotasi 68 ming nafarni tashkil qilgan bo‘lsa, 2022-yilda bu ko‘rsatkich 115 mingga yetkazilgan.

“Umid qilamanki, qizlar ham oliygohlarda o‘qish uchun teng o‘rinlar bilan ta’minlanadi”, – deya yozgan Vladimir Norov.

Qayd etish mumkin, Afg‘onistonda bugun, 6-oktyabr kuni oliygohlarga kirish imtixonlari bo‘lib o‘tadi. Unda 12-sinfni tamomlagan 160 ming nafar bitiruvchi qatnashadi. Ulardan yuz ming nafardan ortig‘i oliygohlarga qabul qilinadi.