Afg‘oniston aeroportlarini nazorat qiluvchi komissiya bosh direktori Latifulloh Hakimiyning aytishicha, sobiq hukumat 164 ta samolyotga ega bo‘lib, hozirda ulardan 81tasi Tolibon hukumati qo‘lida saqlanmoqda.

Afg‘oniston Islom Amirligi rasmiysining aytishicha, hozirda mazkur 81 ta harbiy samolyotdan faqat 41tasi foydalanishga yaroqli.

Uning so‘zlariga ko‘ra, avgust oyi o‘rtalarida sobiq hukumat qulashi paytida Afg‘oniston harbiy samolyotlarining yarmidan ko‘pi xorijga uchib ketgan.

“Bizda 41ta ishchi samolyot bor, ularni afg‘on muhandislari ta’mirlagan. Boshqalaridan foydalanish bo‘yicha ham ishlar olib boryapmiz”, – dedi Hakimiy.

Hakimiyning aytishicha, o‘tgan yilning avgustidagi voqealarda sobiq afg‘on rasmiylari va harbiylari o‘nlab samolyotlarda Tojikiston, O‘zbekiston, Birlashgan Arab Amirliklari va AQShga uchgan.

Ayni paytda esa Tolibon hukumati samolyotlarni qaytarib olish harakatlarini boshlagan.

O‘z o‘rnida harbiy ekspertlar ham Islom Amirligini harbiy samolyot va texnikani qo‘riqlashga chaqirgan.

“Tolibon boshchiligidagi hukumat bilishi kerakki, bu samolyotlar, jumladan, vertolyotlar, minglab harbiy texnika va qurollar Afg‘onistonning milliy xazinasidir”, – deydi sobiq armiya qo‘mondoni general Farid Ahmadiy.

Hisobotlarga ko‘ra, Qo‘shma Shtatlar Afg‘oniston havo kuchlarini qo‘llab-quvvatlash uchun so‘nggi 20 yil ichida 8 milliard dollardan ortiq mablag‘ sarflagan.

• Afg‘oniston
• Toliblar