Afg‘onistonda “Tolibon” radikal harakati tarafdorlari Kobuldagi ayollar namoyishlarini yoritgan uch jurnalistni hibsga oldi. Bu haqda bugun, 22-dekabr kuni mahalliy manbalarga tayanib, Aamaj News agentligi xabar berdi.

Agentlik ma’lumotlariga ko‘ra, muxbirlardan tashqari toliblar Afg‘onistondagi oliy o‘quv yurtlarida talaba qizlarning o‘qishini to‘xtatib qo‘yish haqidagi qaroriga norozilik bildirgan besh ayolni ham hibsga olgan. Hibsga olinganlar norozilikni kuch bilan bostirishga urinayotgan Tolibon askarlari tomonidan jismoniy zo‘ravonlikka uchragan.

Shuningdek, TOLO News telekanaliga ko‘ra , o‘nlab talaba qizlar Kobul ko‘chalariga chiqqan.

Joriy yilning 20-dekabr kuni Tolibon mamlakat universitetlaridan talaba qizlar uchun darslarni keyingi ogohlantirishgacha to‘xtatishni talab qildi. Harakat vakillarining o‘zlari bu qarorni mamlakatdagi noqulay xavfsizlik vaziyati va iqtisodiy muammolar bilan izohlagan.

Ma’lumot uchun, 2021-yil bahorida AQSh oʻz qurolli kuchlarini u yerdan olib chiqish qarorini eʼlon qilganidan soʻng “Tolibon” Afgʻoniston ustidan nazorat oʻrnatish boʻyicha keng koʻlamli operatsiyani boshlagan edi. 15-avgust kuni ular Kobulga jangsiz kirib keldi va 7-sentyabr kuni qonuniyligi hali hech bir davlat tomonidan tan olinmagan muvaqqat hukumat tarkibini e’lon qildi. Tolibon tarafdorlari ayollar va qizlarga turli cheklovlar qo‘ya boshladilar va buni davlatda “tegishli islomiy muhit” yaratish zarurati bilan izohladilar.

• Afg‘oniston
• cheklov